Zim: Twee vas wat dwelmmuil se lyk wou steel

2012-10-30 18:01

Harare – Die Zimbabwiese polisie het twee mans in hegtenis geneem wat probeer het om ‘n man se lyk te steel ná hy 1,4 kg heroïen ingeneem het.

Die Herald het berig dat die twee, albei in hul dertigs, by ‘n lykshuis in Harare in hegtenis geneem is toe hulle die lyk van die beweerde dwelmbaas Ally Omari Mpili probeer neem het.

“Mpili is glo met 1,4 kg heroïen in sy maag dood terwyl hy onderweg was na Suid-Afrika,” het die koerant berig, en gesê dat die dwelms sowat $112 000 (sowat R970 000) werd was.

Sy lyk is na ‘n plaaslike lykshuis geneem.

“’n Nadoodse ondersoek wat op 24 Oktober deur ‘n patoloog uitgevoer is, het gelei to die ontdekking van die romerige stof in Mpili se ingewande,” het Tungamirai Chakurira, ‘n staatsaanklaer, gesê.

Die mans se borgtogaansoek is afgekeur en hulle sal tot 12 November in aanhouding bly.

– Volg Nuus24 op Twitter
 

- Sapa - AFP