Zim: Polisieman sit 18 jaar vir moord

2012-07-05 20:54

Mutare, Zimbabwe – ‘n Voormalige senior polisiebeampte is Donderdag in Zimbabwe tot 18 jaar tronkstraf gevonnis nadat hy ‘n werker wat diamante gemyn het in 2008 doodgeslaan het.

Dit was die eerste skuldigbevinding wat verband hou met beweerde aanrandings by die myne.

Die hooggeregshof het Joseph Chani (51), ‘n voormalige hoof-superintendent van die polisie, skuldig bevind aan die moord op die onwettige myner in Zimbabwe se Marange-velde en die aanranding van drie ander.

Aanklaers sê Chani, wat tydens sy verhoor uit die polisiediens getree het, het Tsorotsai Kusena (37) met kolwe geslaan wat gevolglik tot sy dood gelei het.

Regter Hlekani Mwayera sê die polisiebeampte sal gelyktydig ook drie jaar uitdien vir die aanranding van die drie ander mans.

Junior polisiebeamptes en soldate wat waghou by die velde het getuienisse gelewer tydens die verhoor oor hoe Chani die kleinskaalse myners aangerand het.

Die Marange-velde is al vir jare die middelpunt van beweerde aanrandings deur pres. Robert Mugabe se weermag en die Kimberley-proses het een keer uitvoere van daar opgeskort.

– Volg Nuus24 op Twitter
 

- Sapa - AFP