Zim: Inswering van verkiesings- en menseregtekommissies
2010-04-01 05:49
Harare – Pres. Robert Mugabe het Woensdag lede van die verkiesings- en menseregtekommissies ingesweer.
Dít is ‘n stap vorentoe om sy eenheidsregering ooreenkoms met Morgan Tsvangirai, premier, ten volle te implementeer.
“Ek dink wat belangrik is, is die feit dat ons sommige ooreenkomste kan vervul,” het Tsvangirai na afloop van die seremonie gesê.
Dit is die eerste keer dat dié suiderlike Afrika-land ‘n menseregtekommissie sal hê.
Reginald Austin, voormalige dekaan aan die Universiteit van Zimbabwe sal aan hoof van die kommissie wees, terwyl regter Simpson Mutambanengwe, die voorsitter van die verkiesingskommissie sal wees.
Sedert die vorming van die eenheidsregering in Februarie 2009 het Mugabe en Tsvangirai koppe gestamp oor politieke aanstellings en ook provinsiale goewerneurs.
Tsvangirai het Mugabe daarvan beskuldig dat hy die volle implementering van die eenheidsregering belemmer.
- Sapa-AFP