Zambië: Tsjeggiese toeriste van spioenasie beskuldig
2011-10-25 10:46
Praag – Drie Tsjeggiese toeriste kan met tot 30 jaar lange tronkstraf in Zambië gevonnis word as hulle skuldig aan spioenasie gevind word nadat hulle foto’s naby militêre geboue in dié land geneem het, het die Tsjeggiese departement van buitelandse sake Maandag gesê.
Volgens die departement was die drie werknemers van A&A Expo, ‘n Nederlandse logistieke maatskappy, en het hulle ‘n vriend in Zambië besoek na ‘n sakebesoek aan Johannesburg, Suid-Afrika.
Die drie mense is op 12 Oktober in hegtenis geneem nadat hulle vier foto’s naby militêre geboue geneem het, volgens ‘n verklaringwat deur Tsjeggiese diplomate in Afrika aan die departement gestuur is.
Die drie toeriste is volgens die verklaring op borgtog vrygelaat.
Die foto’s is geneem van ‘n militêre vliegtuig wat ten toon gestel word by ‘n militêre basis, ‘n "geen toegang"-teken buite ‘n ander instelling en die ingang van die presidensiële paleis in Lusaka, die hoofstad.
Kennedy Sakeni, die Zambiese minister van binnelandse sake, het gesê die regering is gewillig om die saak met Tsjeggiese diplomate te bespreek.
Die Zambiese intelligensiediens is ook by die voorval betrokke, luidens die verklaring.
– Volg Nuus24 op Twitter.
- Reuters