Zambië: Oudpres. se seun gearresteer

2012-06-01 13:30

Zambië – Andrew Banda, Zambië se gewese president, Rupiah Banda, se seun en Indië se adjunk-hoëkommissaris is in Lusaka vir korrupsie in hegtenis geneem het die BBC berig.

Banda word daarvan beskuldig dat hy omkoopgeld van meer as $30 000 (sowat R258 000) van 'n Italiaanse padkonstruksiemaatskappy aanvaar het. 

Hy ontken dat dit korrupsie was en sê die betaling is deur Fratelli Locci as kommissie aan sy logistieke maatskappy gemaak.

Sy pa het verlede jaar die tuig as president neergelê nadat hy tydens die presidensiële verkiesing in September aan Michael Sata verloor het.

Sata het sedert hy aan bewind gekom het 'n teenkorrupsieveldtog van stapel gestuur wat daartoe gelei het dat 'n hele aantal voormalige ministers ondersoek en in hegtenis geneem is.

Sata se opponente voel egter hy teiken die voormalige leier en sy vennote as 'n manier om hulle terug te kry.

Volgens die polisie is die hoëkommissaris gearresteer omdat hy nie kan sê waar die $70 000 (sowat R605 000) in sy persoonlike bankrekening vandaan kom nie.

Namukolo Kasumpa, 'n woordvoerder vir Zambië se polisie, het aan verslaggewers gesê Andrew Banda is formeel gearresteer en aangekla. 

Volgens die polisie het hy 2% aandeel van al Fratelli Locci se kontrakte geneem,maar volgens Banda is die geld betaal vir dienste wat hy gelewer het om die maatskappy te help om in die land registreer.

Andrew Banda is oudste seun van Rupiah Banda.

Sy jonger broer, Henry, word ook deur die polisie gesoek in verband met ander korrupsie bewerings en 'n internasionale lasbrief vir sy inhegtenisname is uitgereik nadat hy nie opgedaag het om ondervra te word nie.

Andrew Banda is intussen op borgtog vrygelaat, het sy prokureur, Sakwiba Sikota, gesê.

– Volg Nuus24 op Twitter.