Wondwurm se kop afgekap

2011-07-29 09:31

Accra – Owerhede in Ghana het ná 14 jaar uiteindelik die stryd teen die grillerige medinawurm gewen.

Dié wurm, wat deur larwes in besmette drinkwater oorgedra word, veroorsaak die siekte dracunculiasis, wat eers gediagnoseer kan word wanneer die wurm letterlik by ’n wond kop uitsteek.

John Mahama, adjunk-pres. van Ghana het gister in die stad Tamale gesê die land het die afgelope 14 maande nie ’n enkele geval van medinawurmbesmetting aangeteken nie.

In 1989 was daar 180 000 gevalle. Dit het teen 2005 tot ’n paar honderd gedaal, maar in 2007 weer tot minstens 1 000 gestyg.

Armes in afgeleë dele van Afrika kry dié siekte wanneer hulle water drink waarin larwebesmette watervlooie voorkom.

Dit duur tot ’n jaar vir die meter lange wurm om gewoonlik by ’n blasie op die voet of bene uit te klim.

Dit is blykbaar so seer dat mense maande lank nie kan werk nie.

Sommiges rol die wurm stadig aan ’n vuurhoutjie of stokkie op, ’n proses wat weke of maande kan duur.

– Volksblad

 

- Sapa - AP