Woede neem toe in Nigerië
2012-01-07 07:32
Abuja – Die Nigeriese polisie het Vrydag betogers gekeer wat na die hoofstad se hoofplein wou opruk as deel van betogings oor snel stygende brandstofpryse wat landwyd woede ontlok het.
Sowat 40 betogers wou na Eagle Square in Abuja opruk toe die polisie die pad versper het, het AFP berig.
Die polisie se optrede was die jongste poging om betogings oor die staak van brandstofsubsidies op Nuwejaarsdag in die kiem te smoor. Die einde van die subsidies het petrolpryse meer as laat verdubbel.
Die polisie het Maandag traanrook op betogers in die hoofstad afgevuur en is daarvan beskuldig dat hulle Dinsdag ’n betoger in die deelstaat Kwara doodgeskiet het.
Donderdag het die polisie in die noordelike stad Kano glo traanrook op betogers gevuur en van hulle geslaan.
Landwye stakings word vir aanstaande week beplan. – Sapa-AFP
Volg Nuus24 op Twitter
- Die Burger