Weste oorweeg Somalië-aanvalle
2012-02-23 08:00
Den Haag – As die situasie in Somalië nóg versleg, oorweeg ’n groep Westerse lande dit om lugaanvalle uit te voer op opleidingskampe en basisse van die Islamitiese terreurbeweging Al-Sjabaab en seerowers wat skeepsroetes in die Indiese Oseaan teister.
So het die Britse blad The Guardian Woensdag berig op grond van inligting van ongenoemde bronne in die Britse regering. Die Britse weermag het al planne daarvoor, maar ’n hele ent pad sal nog geloop moet word voordat dit gebeur, lui die berig.
Die politieke wil vir so iets het tot onlangs nie bestaan nie.
As Brittanje tot die daad oorgaan, kan ook Amerika, Frankryk en Nederland aan so ’n operasie deelneem.
Die teikens sal geen gevorderde lugafweervermoë hê nie. Dus sal die aanvalle betreklik eenvoudig wees en uitgevoer kan word deur helikopters op skepe wat aan die kus vaar.
“Ons het nie tans die bates ter plaatse nie,” het ’n amptenaar aan The Guardian gesê. “Dit beteken nie ons kan hulle nie vinnig daar kry nie.”
Blykbaar besef die beplanners dat lugaanvalle ’n korttermynoplossing sal bied, maar op lang termyn is ’n duursame politieke skikking nodig.
Somalië word beskou as ’n mislukte staat. Die land het ’n regering wat net ’n klein deel van die grondgebied beheer en net met die Keniaanse weermag se militêre hulp kan oorleef.
Die noordelike deel van die land het afgeskei en in die res van die land veg krygshere teen mekaar of is seerowers en/of Al-Sjabaab in beheer.
– Volg Nuus24 op Twitter
- Beeld