Weermaghoof meen Tsvangirai is n bedreiging
2011-06-23 17:01
Harare – ‘n Top-weermagoffisier en bondgenoot van president Robert Mugabe het Eerste Minister Morgan Tsvangirai daarvan beskuldig dat hy ‘n nasionale sekuriteitsrisiko en ‘n slaaf van die Westelike magte is, het die media Donderdag berig.
“Tsvangirai is nie ‘n politieke gevaar in Zimbabwe nie, maar hy is ‘n sekuriteitsrisiko,” het die Herald-koerant brigadier-generaal Douglas Nyikayaramba aangehaal.
“Hy neem instruksies van buitelanders wat onwettige regeringsveranderinge in Zimbabwe wil aanbring.
“Dit is wat daartoe gelei het dat die sekuriteitsmagte betrokke is, want ons wil ons belange rondom nasionale veiligheid beskerm.”
Nyikayaramba se kommentaar kom nadat Tsvangirai weermaggeneraals Sondag by ‘n veldtog aangemoedig het om te bedank en vir politieke posisies aansoek te doen, eerder as om intimiderende verklarings te maak.
Nyikayaramba het Tsvangirai se opmerkings as “nonsens” bestempel.
Nyikayaramba is vroeër die week uit die land se grondwetbepaling-liggaam verwyder nadat hy gesê het Mugabe moet "vir ewig" as president aanbly.
“President Mugabe sal slegs sy posisie verlaat as hy so besluit of as hy sterf,” het hy gesê.
“Niemand moet op die oomblik praat asof hy gaan uittree nie. Hy het baie vir hierdie land opgegee. Ons sal vir hom sterf om seker te maak hy bly aan bewind.”
– Volg Nuus24 op Twitter
- SAPA