Weermag brand los op jeugdiges
2010-03-11 03:00
Jos – Ooggetuies het gesê dat soldate in ‘n Nigeriese stad losgebrand het op ‘n groep jeugdiges wat ná die klokreël by ‘n vragmotor saamgedrom het.
‘n Verpleegster het gesê twee van die jeugdiges het gesterf, terwyl vyf ander in die voorval beseer is wat in die Nigeriese stad Jos plaasgevind het. Volgens haar het die jeugdiges vermoed dat die vragmotor wapens vervoer.
Skote van ‘n outomatiese vuurwapen was Dinsdagaand duidelik hoorbaar in Jos.
Die vragmotor, wat slegs vee vervoer het, se voorruit was vol koeëlgate. ‘n Kolonel van die weermag het verslaggewers weerhou om die lyke van die jeugdiges te sien.
Meer as 200 mense het reeds in omliggende dorpe van Jos in geweld gesterf, wat tussen Christen en Moslem-groepe uitgebreek het.
- AP