WVP: Malawi benodig baie voedselhulp

2012-09-07 21:56

Johannesburg – Die Wêreldvoedselprogram (WVP) het met 'n massiewe voedselhulpprogram in Malawi begin en die eerste graan aan 200 000 mense uitgedeel.

“Die situasie is so erg dat sowat 1,6 miljoen Malawiërs voedselhulp oor die volgende paar maande gaan benodig. Dit is agt keer meer as verlede jaar,” het die WVP in ‘n verklaring gesê.

Die VN se voedselagentskap het gewaarsku dat 15 van die 28 streke in Malawi deur die situasie geraak word. Voedselpryse in Malawi het ook drasties toegeneem, wat beteken dat baie Malawiërs nie basiese voedselitems kan bekostig nie.

Die WVP het ook gewaarsku dat hy ‘n tekort aan geld het en dat skenkers meer geld moet inploeg om die voortbestaan van die program te verseker.

Malawi om sy sukkelende ekonomie te herbou nadat die voormalige president Bingu Wa Mutharika bande met baie van Malawi se skenkers gesny het. Mutharika het in April gesterf.

Hy is vervang deur Joyce Banda, wat intussen weer bande met skenkers soos Amerika en Brittanje versterk het.

– Volg Nuus24 op Twitter

- SAPA