Vredeskorps-vrywilliger verkrag
2011-05-11 17:57
Maputo - ‘n Vrywilliger van die Amerikaanse Vredeskorps is in sentraal-Mosambiek met ‘n mes gedreig en verkrag, het die polisie Woensdag gesê, terwyl die Amerikaanse kongres gereed maak om sake oor die veiligheid van dié agentskap se vrywilligers oor die wêreld heen aan te hoor.
Die 30-jarige vrou is aangeval toe sy kort voor middernag op 1 Mei saam met ‘n Mosambiekse vriend in die stad Chimoio gestap het, het Belmiro Mutadiwa, polisiewoordvoerder, gesê.
“Die aanvallers het ‘n paar besittings gesteel en haar verkrag,” het Mutadiwa aan AFP gesê.
Die polisie het later een van die vermeende aanvallers, ‘n 25-jarige man, in hegtenis geneem nadat die slagoffer se vriend hom uitgeken het.
Die slagoffer is na ‘n hospitaal in Maputo geneem en ontvang hulp van die Amerikaanse ambassade, het Mutadiwa gesê.
Die ambassade wou nie kommentaar lewer nie.
Die Vredeskorps, ‘n Amerikaanse regeringsprogram wat vrywilligers stuur om in die buiteland aan ontwikkelingsprojekte te werk, is al meer onder druk oor die veiligheid van die program se 8 655 vrywilligers.
‘n Televisieprogram, 20/20, het in Januarie berig dat tot 1 000 vrywilligers in die afgelope dekade seksueel mishandel of verkrag is en het beweer die agentskap doen nie genoeg om dié kwessie aan te spreek nie.
- Volg Nuus24 op Twitter
- Sapa - AFP