Vrae oor wie Libiese rebelleleier doodskiet
2011-07-30 09:49
Benghazi – ’n Waas van geheimsinnigheid omhul die skietdood van die bevelvoerder van die Libiese rebellemagte.
Rebelle het gesê Abdel Fattah Younes is Donderdag deur aanvallers geskiet nadat hy van die frontlinie ontbied is vir samesprekings.
Sommige ontleders het bespiegel agente van kol. Muammar Gaddafi het hom dalk doodgemaak, terwyl ander meen sy eie mense het dit gedoen.
Dit sou dui op onenigheid in rebelle-kringe tussen diegene wat oorgeloop het van Gaddafi en dié wat nooit vir hom gewerk het nie.
Die rebelle het nie gesê wie Younes doodgemaak het of waar dit gebeur het nie.
Treurende familielede en ondersteuners het gister sy doodskis na die hoofplein van die rebellevesting, Benghazi, gebring en terselfdertyd hul steun aan die oorblywende rebelleleiers toegesê.
Younes se dood kan ’n groot terugslag wees vir die rebelleregering.
Dit blyk ook asof die konflik gaan voortsleep deur die heilige maand Ramadaan in Augustus.
– Volg Nuus24 op Twitter.
– Beeld
- AP