Voortvlugtige Soedannese leier se vliegtuig moet omdraai
2011-06-28 09:20
Johannesburg – Pres. Omar el-Basjhir van Soedan, ’n voortvlugtige voor die internasionale reg, het hom Maandag so byna vasgeloop.
Die Soedanse departement van buitelandse sake het bevestig dat El-Basjhir se vliegtuig, wat met hom na China op pad was, na Teheran in Iran moes omdraai omdat daar “probleme” met sy oorvlugreg oor Toerkmenistan was.
Die Internasionale Strafhof (IS) het twee jaar gelede ’n lasbrief vir El-Basjhir se inhegtenisneming uitgereik.
Hy word onder meer van volksmoord en oorlogmisdade aangekla.
Die staatsleier is na bewering verantwoordelik vir die moorde op en uitdrywing van honderdduisende Soedannese uit hul tradisionele gebiede.
El-Basjhir was op pad na Beijing vir ’n staatsbesoek van vier dae en samesprekings met pres. Hu Jintao van China, maar het nie gister op die bestemde tyd opgedaag nie.
Ingevolge die internasionale lasbrief, soortgelyk aan dié wat Maandag teen kol. Muammar Gaddafi van Libië uitgereik is, kan hy te enige tyd in en deur enige land in hegtenis geneem en aan die hof in Den Haag uitgelewer word.
China, Iran en Toerkmenistan is egter nie ondertekenaars van die Rome-statuut ingevolge waarvan die IS gestig is nie.
Hulle is nie regtens onder die verpligting om hom in hegtenis te neem en uit te lewer nie.
Verskeie nie-lede van die Rome-statuut het egter reeds te kenne gegee dat El-Basjhir in hul lande onwelkom is.
Volgens die Soedanse departement van buitelandse sake sal El-Basjhir egter wel sy reis na Beijing hervat waar hy sal probeer keer dat China ’n olie-ooreenkoms met Suid-Soedan aangaan.
Suid-Soedan word op 9 Julie ’n onafhanklike land.
Dit sal die vorige dag van El-Basjhir se Noord-Soedan afstig.
Volg Nuus24 op Twitter.
- Beeld