Naomi se eks-agent ‘lieg om saak te versterk’
2010-08-11 10:00
Leidschendam (Nederland) – Die supermodel Naomi Campbell se voormalige agent het Dinsdag teruggeveg toe sy onder kruisverhoor van leuens beskuldig is in die saak teen oudpres. Charles Taylor van Liberië.
Die verdediging het aangevoer Carol White het gejok omdat dit haar eie hofsaak teen Campbell sal bevoordeel, maar sy hou vol die supermodel het geweet Taylor het vir haar die diamante gestuur.
Taylor staan voor die Sierra Leone-tribunaal tereg op 11 aanklagte van oorlogsmisdade wat verband hou met die burgeroorlog in Sierra Leone.
Hy word beskuldig dat hy bloeddiamante ontvang het in ruil vir steun aan die rebelle in sy buurland. Hy ontken skuld.
White het gesê sy was by in 1997 toe Campbell vir Jeremy Ractliffe, destyds hoof van die Nelson Mandela-kinderfonds, gesê het die diamante wat sy aan die organisasie wil skenk, kom van Taylor.
Campbell het verlede week getuig sy het nie geweet waar die “steentjies” vandaan gekom het of hoeveel hulle werd is nie.
Taylor se prokureur, Courtenay Griffiths, het gesê White lieg omdat sy haar saak teen Campbell, waarin sy haar vir miljoene dollars dagvaar weens kontrakbreuk, wil versterk. “Dis ’n spul leuens en jy het dit opgemaak,” het hy gister gesê. “Om dit reguit te sê: dit gaan alles vir jou om geld.”
White het aan die hof gesê sy praat die waarheid en dat sy die storie in 1997 vir vriende vertel het, want “dit was toe snaaks”.
“Dit het niks te doen met my sake-argument met Naomi Campbell nie,” het sy gesê.
Mia Farrow het Maandag ook getuig dat Campbell vir haar gesê het sy het ’n “reuse-diamant” by Taylor gekry.
Die statute van die tribunaal maak geen melding van meineed nie.
Volg Nuus24 op Twitter.
- Sapa - AP