Vloedgevaar bedreig Mosambiek weer
2010-03-13 09:51
Cobus Coetzee en Sapa-AP
Johannesburg - Altesaam 13 000 hawelose mense in Mosambiek is deur die land se regering na hoër gebiede verskuif ná swaar reën die afgelope paar weke in veral buurlande soos Zambië geval het en ’n erge vloedgevaar inhou.
Die Mosambiekse regering het Dinsdag ’n waarskuwing uitgestuur oor moontlike vloede in dié land.
Meer as 130 000 Mosambiekers bly in ’n gebied wat deur vloede bedreig word.
Die sentrale en noordelike provinsies Tete, Manica, Sofala, Zambezia, Nampula en Inhambane kan deur dié vloede geraak word.
Volgens owerhede is 800 mense gister reeds deur die stygende vloedwaters vasgekeer.
Die Karibadam in Zimbabwe was verlede week reeds 73% vol en die Cahora Bassa-dam in Mosambiek 72,5%.
Watervlakke in die Karibadam het sedert begin Maart met 3,4% gestyg, lui ’n verslag van die VN se Kantoor vir die Koördinering van Humanitêre Kwessies (OCHA).
Mnr. Elias Mabaso, ’n amptenaar van OCHA, het gister gesê die meeste damme in die Zambezi is nog nie meer as 80% vol nie.
“Sou dit gebeur, sal meer sluise opgemaak moet word, wat erge vloede verder af met die rivier in Mosambiek kan veroorsaak,” het hy gesê.
Die Mosambiekse weerdiens voorspel swaar reën kan tot 15 Maart in die provinsies Zambezia, Nampula, Niassa en Cabo Delgado voorkom, maar dat die nat weer sal opklaar.
Mosambiek het die week gesê die dorp Chiramba, waar 6 500 mense bly, het dringende humanitêre bystand nodig.
Die dorp is slegs met kano’s bereikbaar en is heeltemal deur vloedwaters van die res van die land afgesny.
Die Zambezirivier is tans 5,99 m diep by Katima Mulillo. Die gemiddelde diepte vir dié tyd van die jaar is 3,78 m.
Die Pungwe-, Buzi- en Saveriviere noord van die vakansiedorp Vilanculos is ook in vloed.
Volgens Mabaso is dit die derde agtereenvolgende jaar wat Mosambiek erge vloede beleef.
* Die land se suidelike provinsies is 10 jaar gelede op hul knieë gedwing toe die land deur ’n sikloon en erge vloedwaters van sy buurlande getref is.
- Die Burger