Vier vas oor Benghazi-aanval

2012-09-14 09:00

Tripoli – Libiese owerhede het vier mense in hegtenis geneem in verband met die aanval op die Amerikaanse konsulaat in Benghazi waarin die Amerikaanse ambassadeur en drie personeellede van die ambassade dood is, het die adjunkminister van binnelandse sake gesê.

"Vier mans is in aanhouding en ons is besig om hulle te ondervra. Hulle word daarvan verdink dat hulle gehelp het met die voorval by die Amerikaanse konsulaat," het Wanis Sharif aan Reuters gesê.

Hy het geen verdere inligting bekendgemaak nie.

Christopher Stevens, die Amerikaanse ambassadeur in Libië, en drie ander Amerikaners is dood nadat gewapende mans Dinsdagaand die Amerikaanse konsulaat en 'n veiligheidshuis in die oostelike stad Benghazi aangeval het.

Die aanvallers was deel van 'n bende wat Amerika geblameer het oor 'n film wat volgens hulle profeet Mohammed beledig.

Betogers het Donderdag die Amerikaanse ambassades in Jemen en Egipte aangeval uit protes teen die film.

Amerikaanse oorlogskepe het intussen nader aan Libië beweeg.

Pres. Barack Obama het belowe diegene verantwoordelik vir die Benghazi-aanval sal vervolg word.

Hillary Clinton, die Amerikaanse minister van buitelandse sake, het gesê Washington het niks met die video te doen gehad nie.

– Volg Nuus24 op Twitter.

 

- Reuters