Vier tereggestel vir aanval
2010-08-25 00:20
Libreville – Vier militêre- en regeringsbeamptes in Ekwatoriale Guinee is tereggestel vir hul rol in ‘n aanval op die presidensiële paleis in 2009, het Amnestie Internasionaal (AI) Maandag gesê.
Die vier is Sondag tot doodstraf gevonnis en dieselfde dag tereggestel, het AI in ‘n verklaring gesê.
AI het die tereggestelling van die vier mans, wat probeer het om president Teodoro Obiang Nguema in 2009 dood te maak, afgekeur.
“Jose Abeso Nsue, Manuel Ndong Anseme, Alipio Ndong Asumu en Jacinto Micha Obiang is op 21 Augustus onmiddellik tereggestel nadat hulle deur ‘n militêre hof in die land se hoofstad Malabo, veroordeel is,” het die regtegroep gesê.
Volgens Erwin van der Borght, direkteur van AI in Afrika, is die mans veroordeel ná ‘n onregverdige hofsaak. Hulle is ook glo tereggestel sonder ‘n geleentheid om hul vonnis te appelleer.
Volg Nuus24 op Twitter.
- SAPA