Vier sterf in geweld in Egipte
2012-02-04 11:45
Kaïro – Vier mense is Vrydag dood in ’n tweede dag van geweld in die omgewing van die Egiptiese ministerie van binnelandse sake hier.
’n Betoger en ’n soldaat is Vrydag dood, terwyl twee mense in die stad Suez doodgeskiet is nadat die polisie skerppunt-ammunisie gebruik het om te keer dat ’n skare ’n polisiekantoor bestorm.
Skerppunt-ammunisie is ook in skermutselings voor die hoofkwartier van die staatsveiligheidspolisie gebruik, het ooggetuies en die ambulansdienste gesê. Die betogers het die polisie met groot klippe bestook.
Die geweld van die laaste twee dae is is uit protes teen die dood van 74 mense Woensdagaand in Port Said in die ergste sokkergeweld ooit in Egipte. Sowat 1000 sokkerondersteuners is beseer.
Ambulanspersoneel het lede van die onluspolisie gered nadat hul voertuig per ongeluk in die middel van ’n groep betogers beland het. Die betogers het die voertuig 45 minute lank omsingel en dit rondgestamp.
Sommige van die betogers het ’n menseketting gevorm sodat die polisielede veilig kon wegkom.
Altesaam 28 jeuggroepe en politieke partye het ’n massabetoging uitgeroep vir wat hulle die “Vrydag van Woede” gedoop het.
Byna 400 mense is sedert Donderdag in geweld beseer, het die minister van gesondheid gesê.
Geharde sokkerondersteuners, wat as Ultras bekend staan en gereeld in skermutselings met die polisie betrokke is en aan die voorpunt was van die opstand teen die Moebarak-bewind, het gesê hul betogings sal voortgaan.
“Die misdade wat teen die revolusionêre magte gepleeg is, sal nie die revolusie stuit nie,” lui ’n Ultras-pamflet.
– Volg Nuus24 op Twitter
- Reuters
