Vier moordenaars ontsnap uit tronk
2010-06-11 15:52
Khartoem – Vier Soedanese Islamiete wat tot die doodstraf gevonnis is vir die moord op ‘n Amerikaanse diplomaat en sy drywer in Khartoem, het uit die tronk ontsnap, het ‘n sekuriteitsbron Vrydag gesê.
Die vier mans het Donderdag uit die Kober-tronk in noordelike Khartoem ontsnap, het die bron aan AFP vertel.
John Granville (33) het vir die Amerikaanse agentskap vir internasionale ontwikkeling (USAid) gewerk.
Hy en sy drywer Abdel Rahman Abbas (40) is op 1 Januarie 2008 in hul motor doodgeskiet toe hulle teruggekom het van ‘n oujaarsaandpartytjie.
Die Soedanese owerhede het die vyf jong Islamiete van biede moorde aangekla. Vier van hulle is met die doodstraf gevonnis.
Die ander man is tot twee jaar tronkstraf gevonnis aangesien hy die vuurwapens verskaf het. Hy is verlede jaar vrygelaat.
Volg Nuus24 op Twitter.
- Sapa - AFP