Val buitelanders aan, vra Libiese netwerk
2011-03-05 10:02
Djerba, Tunisië – Libië se openbare telekommunikasiemaatskappy het sy intekenare in SMS-boodskappe gevra om buitelanders aan te val omdat hulle kwansuis “moeilikheid saai” en die land “verwoes”, het getuies gisteraaand gesê.
Egiptiese vlugtelinge wat uit Libië vlug, het een van dié boodskappe van die maatskappy Lubyana aan AFP gewys.
Die boodskap, in Arabies en gedateer 19 Februarie, sê buitelanders is besig om teen die land saam te sweer.
Verskeie vlugtelinge het vertel van geweldpleging teen hulle.
“Daar was sterftes. Egiptenare, Tunisiërs – insluitend vroue en kinders,” het een gesê.
- Volg Nuus24 op Twitter.
- Sapa - AFP