VSA veroordeel aanval op nuwe Somaliese leier

2012-09-14 11:03

Washington – Die VSA het Donderdag die beweerde sluipmoordaanval teen Somalië se nuwe president veroordeel, enkele dae nadat hy die hoop uitgespreek het dat die verkiesing 'n nuwe era vir dié Afrika-land sal verteenwoordig ná twee dekades van onstabiliteit.

"Amerika veroordeel die aanvalle ten sterkste en doen 'n beroep op alle Somaliërs om hulle nie tot geweld te wend nie," het Hilary Renner, woordvoerder van die staatsdepartement se buro wat Afrika-sake hanteer, aan AFP gesê.

Hassan Sheikh Mohamud het Maandag se verkiesing in Somalië gewen.

Washington het hom Dinsdag gelukgewens, terwyl die Withuis dit as "'n belangrike mylpaal" vir die land beskryf het.

Hassan is Donderdag egter na 'n plek van veiligheid geneem nadat hy 'n bomaanval by 'n hotel oorleef het. Drie ander mense is in die ontploffing dood.

Al-Shabaab-rebelle wat met Al-Kaïda bande het, het aanspreeklikheid vir die bomaanvalle Woensdag buite die hotel in Mogadisjoe aanvaar.

– Volg Nuus24 op Twitter.

- AFP