VSA verleng sanksies teen Zim met ’n jaar
2010-03-03 07:16
Johannesburg – Amerikaanse sanksies teen pres. Robert Mugabe en sy senior volgelinge is met nog ’n jaar verleng.
Dit kom nadat pres. Jacob Zuma en Mugabe se aartsteenstander en Zimbabwiese premier, Morgan Tsvangirai, vir ’n opheffing van die strafmaatreëls gevra het.
Pres. Barack Obama het Dinsdag in ’n verklaring gesê die voortgesette optrede deur Mugabe en sy luitenante “bly ’n regstreekse bedreiging vir die VSA se buitelandse beleid en belange.”
Obama se optrede volg enkele weke nadat die Europese Unie (EU) ook besluit het om geteikende sanksies nog ’n jaar lank teen Mugabe se familie, senior leiers van Zanu-PF en die topstruktuur van Zimbabwe se veiligheidsdienste in stand te hou.
Onder die sanksies is ’n verbod op internasionale reise, die bevriesing van individue se bates in die VSA en Europa en ’n verbod op handel met minstens 17 groot Zimbabwiese maatskappye.
Obama het na Mugabe verwys as ’n diktator wat Zimbabwe se ekonomie en sy demokratiese instellings en prosesse bly ondermyn.
Die Amerikaanse besluit om die EU se voorbeeld te volg, kom ten tyde van Zuma se ampsbesoek dié week aan Brittanje, waar hy die Britse regering na verwagting gaan versoek om sanksies teen Zimbabwe op te hef.
Zuma het voor sy vertrek na Londen te kenne gegee dat die behoud van sanksies pogings bemoeilik om ’n skikking in Zimbabwe se jaar lange regeringskrisis te bewerkstellig.
Die Suider-Afrikaanse Ontwikkelingsgemeenskap (SAOG) het Zuma getaak om die voortslepende geskille tussen Mugabe en Tsvangirai by te lê.
Mugabe dring egter daarop aan dat Tsvangirai die VSA en die EU oorreed om sanksies te laat vaar voordat hy (Mugabe) enigsins verder onderhandel.
Zuma het reeds aangedui dat die geskille tussen dié twee leiers so groot is dat ’n verkiesing gehou moet word om ’n nuwe regering aan te wys. Mugabe is gekant teen so ’n verkiesing totdat sanksies opgehef is.– Media24-Afrika-kantoor en Reuters
- Die Burger