VN-werker in Soedan ontvoer
2010-10-08 11:37
El Fasher, Soedan – Soedannese magte het Vrydag ‘n soektog geloods in El Fasher, in die noorde van Darfoer, nadat gewapende mans ‘n VN-werker tydens ‘n besoek deur ambassadeurs van die sekuriteitsraad ontvoer het.
Hierdie ontvoering was die eerste in die stad, het ‘n woordvoerder gesê.
Die ontvoerde persoon werk vir die gesamentlike VN-Afrika-Unie-vredesmag in die westelike deel van Soedan.
“Soedannese amptenare het ‘n bulletin uitgereik en met ‘n onmiddellike soektog begin,” het woordvoerder Kemal Saiki gesê.
“Soedannese polisie het ook sekuriteit by ondersoekpunte in El Fasher opgeskerp.”
Volgens Saiki het vier of vyf gewapende mans vroeg Donderdagaand by ‘n huis waar VN-werkers gewoon het ingebreek en twee van die vier wat daar was ontvoer.
“Hulle het die mans vasgemaak en weggeneem in een van die UNAMID-motors wat daar was,” het hy gesê.
“Een van die UNAMID-werkers het dit reggekry om te ontsnap. Hy het die deur oopgemaak en uitgespring.”
Saiki het bygevoeg dat dit onbekend was wie vir die ontvoering verantwoordelik is.
Volg Nuus24 op Twitter
- AFP