VN-troepe begin skiet in Ivoorkus
2010-12-20 22:45
Abidjan - Troepe van die Verenigde Nasies (VN) moes begin skiet om hul mandaat, wat die beskerming van burgerlikes insluit, in die Ivoorkus te verdedig, het die VN se hoof-vredesbeampte Maandag gesê.
"Ons het die reg om ons gewere te gebruik in die geval van selfverdediging of die verdediging van ons mandaat, het die VN se Alain Le Roy aan Reuters in 'n telefoononderhoud gesê.
Dit is nie duidelik hoe die 10 000 VN-troepe sal reageer in die geval van 'n burgeroorlog nie. Maar VN-amptenare het in privaat gesprekke laat blyk dat die troepe nie oorlog sal voer teen een of ander millitêre mag nie.
Verskeie VN-amptenare het op versoek van anonimiteit aan Reuters gesê dat die VN moontlik 'n lid van president Laurent Ggagbo se magte Saterdag doodgeskiet het. Maar dié sterfte moet nog bevestig word.
President Gbagbo weier sedert 4 Desember om sy pos te verlaat nadat hy die pas afgelope verkiesing in die Ivoorkus verloor het.
Volgens dié land se verkiesingskommissie het Alassane Ouattara die verkiesing gewen.
Volg Nuus24 op Twitter.
- AFP