VN-personeel uit Tripoli ontruim
2011-05-01 20:03
Tripoli - Die Verenigde Nasies het gesê dié liggaam se internasionale personeel word uit Tripoli ontruim weens onrus in dié Libiese hoofstad.
Stephanie Bunker, woordvoerder van die VN se kantoor vir die koördinasie van humanitêre kwessies, het Sondag gesê 12 personeellede is in die proses om die land te verlaat.
Sy sê verteenwoordigers van verskeie VN-organisasies het in Tripoli aangekom kort nadat die VN se hoof van humanitêre kwessies, Valerie Amos, op 10 April ‘n ooreenkoms met die Libiese regering aangegaan het wat VN-agentskappe in Tripoli sou toelaat.
VN-personeellede bly aan in die rebelstad Benghazi in die ooste van die land.
Die ontruiming kom slegs ure nadat die Libiese leier, Muammar Gaddafi, luidens verslae ‘n noue ontkoming gehad het tydens ‘n Navo-lugaanval. ‘n Regeringswoordvoerder het gesê die missiel het een van Gaddafi se seuns en drie van sy jong kleinkinders gedood.
- Volg Nuus24 op Twitter
- Sapa - AP