VN-hoof gekwel oor Horing van Afrika
2011-07-13 11:13
New York – Ban Ki-moon, die hoof van die Verenigde Nasies, het Dinsdag gesê hy is “uiters bekommerd” oor die erge droogtetoestande in die Horing van Afrika wat dreig tot grootskaalse hongersnood en dood.
“Meer as 11 miljoen mense het dringend hulp nodig om te oorleef. Hulle staar een van die ergste droogtes in die gesig,” het die VN se sekretaris-generaal gesê.
“Ek het gevra vir ‘n dringende vergadering met die hoofde van die VN-agentskappe.”
Ban het gesê onmiddelike aksie moet geneem word as miljoene mense in die Horing van Afrika hongersnood wil vryspring.
“Ons moet alles in ons vermoë doen om te verhoed dat die krisis nog erger word. Die humanitêre prys van die krisis is katastrofies. Ons kan dit nie bekostig om te wag nie.”
Duisende Somaliërs het die afgelope paar maande uit hul tuisland gevlug om hulp in Kenia en Ethiopië te soek.
In Ethiopië, waar die toestande ewe erg is, het landboubeamptes vandeesweek gesê dat sowat 4.5 miljoen van sy mense teen die einde van die jaar humanitêre voedsel gaan benodig.
– Volg Nuus24 op Twitter.
- Sapa - AFP