VN en ander stuur nóg soldate na Ivoorkus
2011-09-19 12:35
Abidjan – Die Verenigde Nasies het nog soldate op die Ivoorkus se grens met Liberië ontplooi na dodelike aanvalle op dorpies in dié omgewing, het ‘n militêre beampte gesê.
Aanvanklik is berig dat 15 mense tydens die aanvalle dood is, maar die nuutste sterftesyfer is 23. Die dorpies, in ‘n omgewing berug vir konflik tussen inheemse stamme en boere, is deur huursoldate van Liberië aangeval.
“Ons het nog soldate na die gebied gestuur en die VN in die Ivoorkus (UNOCI) het ook van hulle magte ontplooi om ‘n einde aan daardie aanvalle te bring,” het kapt. Alla Kouakou van die Ivoriaanse weermag gesê.
Hy het gesê die regerings van Guinee, Liberië en Sierra Leone gaan ook soldate stuur. Die groep lande behoort aan die Mano-rivier-unie en het gewaarsku dat onsekerheid op die grens ‘n bedreiging vir die hele Wes-Afrika-streek kan inhou.
– Volg Nuus24 op Twitter.
- Reuters