VK aan Kenia: 'Betaal ons gesteelde geld terug'
2011-06-23 09:09
Nairobi – Onthullings dat $45 miljoen (sowat R300 miljoen) wat vir Keniaanse laerskoolkinders se opvoeding geskenk is, gesteel is, is besig om in Kenia in 'n politiese tameletjie te ontaard.
Die VK, 'n groot donateur, het Kenia se regering aangesê om die porsie wat deur Brittanje geskenk is terug te betaal, terwyl aktiviste hulle Woensdag in die minister van onderwys se kantore toegesluit het en sy inhegtenisname geëis het.
Brittanje het Maandag aan die Keniaanse regering gesê hy sal geen meer geld skenk tot daar nie "oortuigende bewyse" is van 'n aansienlike verbetering in die regering se integriteit en finansiële bestuur nie.
Die Keniaanse minister van onderwys, Sam Ongeri, het verlede week voor sy parlement aangevoer dat hy nie blameer kan word vir die verdwyning van die fondse nie omdat hy nog nie in die amp aangestel was toe die diefstal in 2005 begin het nie.
Volgens Ongeri het hy gehelp om die bedrog bloot te lê toe hy in 2008 as minister van onderwys aangestel is.
"My gewete is vry en skoon want ek het my taak verrig tot die beste van my vermoë," het hy aan die parlement gesê.
Die Britse regering wil egter hê amptenare wat vir die geld verantwoordelik is moet aan die pen ry.
"Keniane moet daarvan bewus wees dat (die) meerderheid van die gesteelde geld van Keniaanse belastingbetalers kom," lui 'n verklaring deur die VK.
"Die VK deel die woede van Keniane en hulle wens vir meer veramtwoordbaarheid en deursigtigheid in die gebruik van hulle hardverdiende belasting."
– Volg Nuus24 op Twitter.
- Sapa - AFP