Ugandese opposisieleier in hegtenis geneem
2011-04-18 13:53
Kampala - Uganda se hoof-opposisieleier, Kizza Besigye, is Maandag vir die derde keer in een week in hegtenis geneem nadat hy 'n optog gelei het in protes teen hoë kommoditeitspryse.
Besigye, die naaswenner van die Februarie-verkiesing, is verlede week in sy hand gewond toe polisie traangas en rubberkoeëls gebruik het om betogers uiteen te jaag wat aan protesaksies deelgeneem het.
Ibrahim Semuju, ‘n opposisielid van die parlement, wat ook in hegtenis geneem is, het gesê dat Besigye, ‘n afgetrede kolonel en nou ‘n politikus, in polisieselle in Kasangati in die noorde van Kampala aangehou word.
“Die kolonel is in hegtenis geneem en word by die Kasangati-polisiestasie aangehou. Ek is ook in hegtenis geneem en gaan na die Jinja Road-polisiestasie geneem word,” het Semuju gesê.
- Volg Nuus24 op Twitter.
- Sapa-DPA