Ugandese baba kry ’n nuwe gesig
2010-08-16 12:00
16/08/10
Beeld
Jeanne-Marié Versluis
Pretoria - Die nuwe neus van ’n Ugandese baba wie se gesig erg geskend is in ’n brand, is gister in ’n ure lange operasie uit een van haar ribbe se been gebou.
Vel is ook op Racheal Acen se gesig oorgeplant nadat haar ooglede onder meer afgebrand en haar bolip geskend is.
’n Nuwe gesig is ’n buitengewone verjaardaggeskenk vir dié baba wat op 30 Augustus ’n jaar oud word.
Dr. Franz Birkholtz, ’n plastiese en rekonstruktiewe chirurg en mediese direkteur van die RE-stigting, het die operasie in die Zuid-Afrikaans-hospitaal in Pretoria gedoen.
Me. Isabel Mischke, besturende direkteur van die RE-stigting, het gesê dié stigting is ’n art. 21-maatskappy wat deur borge gefinansier word om gespesialiseerde mediese dienste aan weerloses in Afrika te lewer.
Die stigting se mediese span het Racheal in ’n staatshospitaal in Uganda gevind.
Hulle het besluit om haar na Suid-Afrika te bring vir gesig¬rekonstruksie.
Toe Racheal en haar tweelingsuster sowat vyf maande oud was, het ’n paraffienlamp langs hulle omgeval toe hulle in hul hut in die noorde van Uganda geslaap het.
’n Brand het ontstaan en die tweelingsussie het dit nie oorleef nie.
Mischke het gesê Racheal se kombers het aan die brand geraak en haar gesig het gebrand voordat haar ma, me. Rose Alwedo, by haar kon uitkom.
“Haar ooglede het afgebrand.
“Haar neus het afgebrand.
“Daar was net die twee gaatjies (vir haar neus). Haar bolip het heeltemal opgetrek.”
Die baba se geskende voorkoms het meegebring dat die samelewing haar verwerp het, het Mischke vertel.
“Die Zuid-Afrikaans-hospitaal het Racheal se teatertyd, ’n bed in die waakeenheid en hospitaalverblyf vir ’n week geborg.
“Só iets sou sowat R120 000 gekos het.
“Die mediese span van die RE-stigting gee sy tyd en kundigheid gratis en materiale wat benodig word vir chirurgie, word geborg.”
Racheal is Donderdag opgeneem nadat sy en haar ma na Suid-Afrika gevlieg het.
Mischke het gesê vel is van onder haar regterarm en van haar bobeen geneem en op haar gesig oorgeplant.
Ooglede is vir haar gemaak.
Racheal en haar ma is op die stigting se uitnodiging vergesel deur dr. Edris Kalanzi, Uganda se enigste plastiese en rekonstruktiewe chirurg.
Hy het Birkholtz in die operasie bygestaan en dit dien as ’n opleidingsgeleentheid vir Kalanzi.
Volg Nuus24 op Twitter.
- Beeld