Uganda: Vervaardiger van gay-verhoogstuk vrygelaat

2012-09-17 17:32

Kampala – Uganda het ‘n Britse teatervervaardiger op borgtog vrygelaat ná hy in hegtenis geneem is oor ‘n produksie oor ‘n homoseksuele man.

Die produksie was glo sonder die regte magtiging gehou, het sy prokureur gesê.

David Cecil, wat tot twee jaar tronkstraf kan kry as hy skuldig bevind word, is Donderdag in hegtenis geneem.

“Hy is nou borgtog toegestaan en word vrygelaat,” het John Francis Onyango, Cecil se prokureur, gesê en bygevoeg dat die borgtog sowat $200 (sowat R1 600) gekos het.

Onyango het gesê dat Cecil in ‘n goeie toestand is en dat hy beveel is om weer in ‘n maand se tyd in die hof te verskyn.

Cecil (34) moet spesiale magtiging vanaf die hof kry as hy die land wil verlaat.

Die verhoogstuk The River and The Mountain was by verskeie teaters in Kampala aangebied ten spyte daarvan dat Uganda se regering dit verban het.

Die verhoogstuk volg ‘n man wat openlik erken dat hy gay is en volg ook Uganda se uitgesproke anti-homoseksuele beleide.

Homoseksualiteit is ‘n misdaad in Uganda en die regering oorweeg dit om sekere homoseksuele dade met die doodstraf te penaliseer.

Die openbare bespreking van homoseksualiteit kan met sewe jaar tronkstraf gestraf word.

– Volg Nuus24 op Twitter

- AFP