Uganda: Twee vermiste helikopters gevind
2012-08-14 10:30
Nairobi – Die verbrande wrakke van twee Ugandese weermaghelikopters is twee dae ná dit in ‘n digte woud neergestort het, gevind.
“Die helikopters is gevind, maar albei is verbrand,” het ‘n senior Keniaanse weermagbeampte gesê.
“Die lot van die bemanningslede is nog onbekend.”
Bogita Ongeri, woordvoerder van Kenia se weermag, het bevestig dat die helikopters gevind is.
“'n Vliegtuig het die helikopters naby Berg Kenia opgespoor,” het Ongeri gesê en bygevoeg dat beamptes verdere inligting deur die loop van die dag sal bekend maak.
“Die reddingspogings duur voort.”
‘n Derde helikopter, wat op dieselfde sending ná Somalië op pad was, het ook Sondag in dié streek neergestort. Al sewe bemanningslede is Maandag gered nadat hulle hul radio's gebruik het om hulp te ontbied.
Die drie Russiese Mi-24 helikopters was op pad ná Somalië om Afrika Unie (AU)-troepe te gaan bystaan in hul gevegte teen die al-Shabaab.
‘n Vierde Mi-17 helikopter, wat deel was van dieselfde sending, het sonder probleme in die Oos-Keniaanse dorpie van Garissa geland.
Uganda verskaf sowat ‘n derde van die 17 000 AU-troepe in Somalië.
– Volg Nuus24 op Twitter
- AFP
