Uganda: 23 dood tydens grondverskuiwing
2011-08-29 15:35
Kampala – Minstens 23 mense is Maandag dood tydens grondverskuiwings wat deur ‘n stortvloed reën in Uganda veroorsaak is, het ‘n woordvoerder van Rooikruis gesê.
Inwoners en Rooikruis-werkers het 15 lyke uit die puin in Mabono in die Bulambuli-distrik getrek, het Catherine Ntabadde, ‘n Rooikruis-woordvoerder, gesê.
Twee mense is in Mabono gered, maar agt ander is dood nadat ‘n modderstorting ‘n ander dorp in dieselfde omgewing vernietig het, het Ntabadde gesê. Sy het gesê die sterftesyfer kan nog hoër klim.
“Ons het spanne na die gebiede wat deur dié ramp geraak is, gestuur. Die kanse is goed dat daar nog meer slagoffers gevind gaan word,” het sy gesê.
Onlangse swaar reën in die ooste van Uganda het erge vloede veroorsaak en honderde mense ontwortel.
Vroeër die maand is minstens sewe mense in ‘n grondverskuiwing in ‘n dorp in die noordooste van Uganda dood.
– Volg Nuus24 op Twitter.
- Sapa - AFP