Uganda: 18 leerders dood na weerlig skool tref
2011-06-29 15:24
Kampala - Agtien leerders is dood en 50 beseer toe ‘n weerligstraal ‘n laerskool in die weste van Uganda getref het, het die polisie Woensdag gesê.
Weerlig het Dinsdag die Laerskool Runyanya in Kiryandongo, 225 km noord van Kampala, getref. Daar is 15 meisies en drie seuns dood, het Judith Nabakooba, die polisiewoordvoerder, gesê.
“Die beseerdes is na ‘n nabygeleë hospitaal geneem. Van die wat ernstig beseer is, is 15 na die Mulago-hospitaal in Kampala geneem,” het Nabakooba gesê.
Volgens plaaslike media het ‘n verdere 21 skoolleerders Dinsdag doodgebrand nadat weerlig ‘n skool in die Zombo-distrik getref het. Dié voorval kon egter nie deur die polisie bevestig word nie.
Nabakooba kon nie bevestig presies hoeveel mense die afgelope ruk deur weerlig dood is nie. Volgens‘n plaaslike koerant is daar in die afgelope week 28 mense dood, insluitend Dinsdag se slagoffers.
Uganda ondervind swaar reënstorms wat nie normaal vir die seisoen is nie.
- Volg Nuus24 op Twitter.