Tyd raak min vir Britse gyselaar
2011-12-07 12:19
Nouakchott – Gewapende, gemaskerde mans het gedreig om ‘n Britse gyselaar wat in Nigerië ontvoer is om die lewe te bring as daar nie aan hulle eise voldoen word nie.
Die boodskap is in ‘n video oorgedra wat deur ‘n Mauritaniese nuusagentskap sowel as die nuusagentskap AFP ontvang is.
Die beeldmateriaal is op 1 Desember na Agence Nouakchott Informations (ANI) gestuur. Die agentskap sê die ontvoerders behoort aan ‘n Nigeriese groep wat deur al-Kaïda geïnspireer is.
In die video staan drie gemaskerde mans by ‘n Britse man – AFP het besluit om nie sy identiteit bekend te maak nie.
Een van die gewapende mans het ‘n spertyd van twee weke aan die Britse regering gegee om aan die groep se eise te voldoen. Daar is nie in die video gesê wat die vereistes is nie, maar die man het gesê dat die gyselaar se familie en die Britse regering weet wat van hulle verwag word.
In die video gee die gyselaar sy naam en ouderdom en smeek hy die Britse regering om oor sy veilige vrylating met die ontvoerders te onderhandel.
Die Britse man is in Mei saam met ‘n Italiaanse man ontvoer toe 'n gewapende groep hulle woonstel in Birnin Kebbi, in die noordweste van Nigerië, bestorm het.
Daar is geen aanduiding van wanneer of waar die video gemaak is nie.
Die Britse departement van buitelandse sake wou nie kommentaar lewer nie.
– Volg Nuus24 op Twitter.
- Sapa - AFP