Tweede Mubarak-hofsessie begin
2011-08-15 10:32
Kaïro – Hosni Mubarak, die voormalige president van Egipte, se moord- en korrupsieverhoor, wat volgens sy regsverteenwoordigers 'n langdurige proses sal wees, gaan Maandag voort.
Mubarak (83) word daarvan aangekla dat hy betrokke was by die moord van betogers wat teen die regering betoog het tydens ‘n opstand in Januarie en Februarie vanjaar.
Dié betogings het sy bewind van meer as drie dekades tot ‘n einde gebring.
Sy twee seuns, Gamal en Alaa, word ook van korrupsie aangekla en Mubarak se voormalige minister van binnelandse sake, Habib al-Adly, en ses voormalige polisiebevelvoerders word saam met hom van moord aangekla.
Hulle word almal apart verhoor maar die sake word deur dieselfde regter hanteer.
Mubarak word tans aangehou in ‘n militêre hospitaal in die buitewyke van Kaïro.
Tydens die eerste sessie op 3 Augustus is Mubarak op ‘n bed by die hof ingedra en in ‘n sel saam met sy medebeskuldigdes aangehou. Hy is met ‘n militêre vliegtuig vanaf Sharm el-Sheikh, ‘n oord by die Rooi See, ingevlieg.
Volg Nuus24 op Twitter.
- Sapa - AFP