Twee Sweedse joernaliste in Ethiopië vas
2011-09-08 14:26
Stockholm – Twee Sweedse joernaliste is in Ethiopië in hegtenis geneem en aangekla van terrorisme en reisoortredings, het die Sweedse departement van buitelandse sake gesê.
Johan Persson en Martin Schibbye is in Julie deur Ethiopiese troepe aangekeer tydens botsings met rebelle in Ogaden in die ooste van die land.
Anders Jorle, ‘n woordvoerder van die departement, het gesê dat Sweedse beamptes die twee mans Woensdag besoek het. Hulle word glo goed behandel.
Joernaliste is verbied om vryelik in die Ogaden-omgewing, wat aan Somalië grens, te reis.
Aktiviste beskuldig die Ethiopiese regering van skending van menseregte in dié omgewing en dat hulle noodlenigingsgroepe toegang verbied.
Die regering ontken gerugte van mishandeling en het gesê dat die rebelle misdade gepleeg het en burgerlikes vermoor het.
– Volg Nuus24 op Twitter.
- AP