Tunisië: Hotel aangeval oor alkohol

2012-09-05 15:05

Tunisië – Moslem-ekstremiste het ‘n hotel in die Tunisiese dorpie Sidi Bouzid aangeval omdat 'n kroeg in die gebou steeds alkohol bedien.

Aktiviste het bottels gebreek en klante weggejaag by die Horchani-hotel, het nuusagentskappe berig.

Die verkoop en drink van alkohol is wettig in Tunisië. Die land het egter die afgelope tyd ‘n herlewing in Islamitiese ekstremiste-voorvalle beleef sedert pres. Ben Ali uit sy pos gewerk is.

Jamil Horchani, eienaar van die hotel, het gesê ekstremiste het die hotel Maandagaand aangeval en heelwat skade aangerig.

“Hulle het die kamers binnegegaan, die meubels beskadig en bottels gebreek.”

Volgens Horchani het die groep al voorheen gedreig om die hotel aan te val tensy hy nie ophou alkohol bedien nie.

Moslem-ekstremiste het in Mei ‘n optog gehou waartydens hulle gevra het dat hotelle en kroeë wat alkohol bedien, buite die dorp hervestig moet word.

– Volg Nuus24 op Twitter
 

- Reuters