Tsvangirai trou ten spyte van hofbevel

2012-09-16 07:49

Harare – Die Zimbabwiese premier, Morgan Tsvangirai, en sy verloofde, Elizabeth Macheka, het Saterdag getrou ten spyte van bewerings dat hy steeds met 'n ander vrou getroud is.

Die 60-jarige leier van die Movement for Democratic Change (MDC) en sy 35-jarige bruid is tydens 'n kleurvolle seremonie by die Harare-stadion getroud.

Minstens 2 000 ondersteuners het die troue bygewoon.

Locardia Karimatsenga (40) het vroeër die week in hofdokumente aangevoer sy en Tsvangirai is verlede jaar in November tydens 'n tradisionele seremonie in die huwelik bevestig.

Tsvangirai en Karimatsenga het egter 12 dae nadat hulle in die huwelik bevestig is, geskei.

'n Hof het Vrydag beslis dat Tsvangirai steeds wettiglik met Karimatsenga getroud is en indien hy voortgaan met die troue gaan hy bigamie pleeg.

Tsvangirai het voor die troue aan sy ondersteuners gesê die hofbevel is polities gemotiveerd.

Tsvangirai en Macheka het nie Saterdag die trouregister geteken nie.

– Volg Nuus24 op Twitter.
 

- Sapa-DPA