Tripoli: Verbrande lyke in pakhuis gevind
2011-08-29 10:42
Tripoli – Talle verbrande lyke is in ‘n pakhuis buite Tripoli gevind terwyl daar steeds na duisende vermiste gevangenes van Muammar Gaddafi se regime in Libië gesoek word.
Gaddafi se troepe het die pakhuis in Salahaddin, suid van Tripoli, gebruik om burgerlikes aan te hou.
Die menseregtewaghond Human Rights Watch, wat onderhoude met van die oorlewendes gevoer het, het gesê die gevangenes is verlede Dinsdag tereggestel toe Gaddafi se troepe hulle begin skiet het en handgranate in die pakhuis gegooi het.
Die gebou is drie dae later aan die brand gesteek.
Sowat 45 lyke is in die pakhuis gevind en twee lyke wat nie verkool is nie, is buite die pakhuis aangetref.
Die pakhuis was langs ‘n militêre basis geleë.
“Dit is ongelukkig nie die enigste geval van gevangenes wat tereggestel is in die laaste dae wat die Gaddafi-regering beheer oor Tripoli gehad het nie,” het Sarah Leah Whitson, ‘n direkteur van Human Rights Watch in die Midde-Ooste en Noord-Afrika, gesê.
Volgens van die gevangenes wat oorleef het, is hulle aangehou omdat hulle daarvan verdink is dat hulle rebelle was of die rebelle ondersteun het.
Volgens die Nasionale Oorgangsraad word sowat 50 000 gevangenes van die Gaddafi-regime vermis.
Die rebelle het ook verbrande lyke van gevangenes in hospitale gevind.
– Volg Nuus24 op Twitter.
- Sapa-DPA