Toutrekkery oor Gaddafi se lyk
2011-10-22 09:17
Kaïro – Familielede van die voormalige Libiese leier Muammar Gaddafi het Saterdag die Nasionale Oorgangsraad gevra om sy lyk te oorhandig sodat hy volgens Islamitiese vereistes in Sirte begrawe kan word.
"Ons doen 'n beroep op die VN, die Organization of the Islamic Conference en Amnestie Internasionaal om die Nasionale Oorgangsraad te dwing om die martelaars se lyke aan ons in Sirte te oorhandig en om ons toe te laat om die begrafnis volgens Islamitiese reëls en tradisies uit te voer," het 'n verklaring gelui.
Volgens die verklaring, wat deur die Siriese pro-Gaddafi-televisiestasie Al-Rai uitgesaai is, eis familielede dat die lyke van Gaddafi, sy seun en ander wat Donderdag om die lewe gebring is, dadelik oorhandig word.
Gaddafi is Donderdag lewend deur vegters in Sirte aangekeer. Volgens party ooggetuies is hy gevind waar hy in 'n pyp onder 'n pad wegkruip.
Gaddafi en sy seun Moutassem is kort ná hulle gevange geneem is om die lewe gebring.
– Volg Nuus24 op Twitter.
- Sapa-DPA