Togo uit Afrikabeker ná dodelike aanval
2010-01-09 20:37
Cabinda - Togo se nasionale sokkerspan het hulself aan die Afrikabeker-sokkertoernooi onttrek ná drie mense dood is tydens 'n aanval op die span se toerbus.
Die bus is Saterdag aangeval in die Angolese provinsie van Cabinda, waar rebelle gereeld terreur saai.
Manchester City het Saterdagmiddag bevestig Togo sal nie aan die sokkertoernooi deelneem nie.
Togo se kaptein, Emmanuel Adebayor, speel ook vir dié Engelse span.
Kossie Agassa, 'n doelwagter vir Togo, het aan 'n Franse radiostasie, Istres, gesê drie passasiers is tydens die aanval dood.
'n Assistent-afrigter, 'n spanwoordvoerder en die Angolese busbestuurder het omgekom. Die name van die slagoffers was nie ten tyde van die berig bekend nie.
Volgens organiseerders sal die sokkertoernooi egter voortgaan.
'n Plaaslike rebellegroep, FLEC, het verantwoordelikheid vir die aanval aanvaar. Hulle het ook gedreig dat soortgelyke terreur sou volg.
- Sapa-AFP