Togo: Voormalige hoof van oliereus verskyn in hof
2012-09-17 13:46
Lome – Loik Le Floch-Prigent, voormalige hoof van die oliereus Elf, moet in ‘n Togolese hof verskyn na hy aan die land as gevolg van ‘n bedrogondersoek uitgelewer is.
Die voormalige voorsitter van Elf is in Abidjan, Ivoorkus in hegtenis geneem toe hy Vrydagaand probeer het om ‘n vlug na Parys te haal.
Hy is die volgende dag na Togo verplaas en sal glo Maandag in die hof verskyn.
Le Floch-Prigent se prokureur, Patrick Klugman, het die uitlewering sterk veroordeel.
“Die maniere van uitlewering wat ons ken, is nie gerespekteer nie,” het Klugman gesê.
Hy het vroeër die uitlewering as ontvoering afgemaak, maar het intussen die uitlating terug getrek.
‘n Aanklaer in die Ivoorkus het egter gesê dat die internasionale verplasing ‘n saak tussen die twee lande se polisiemagte is.
“Ons het die reëls van Interpol gevolg,” het Noe Dje, Interpol se adjunk-aanklaer, gesê.
Le Floch-Prigent se in hegetenisneming volg ná ‘n Emirati-sakeman beweer het dat hy die slagoffer van bedrog ter waarde van $48 miljoen (sowat R395 miljoen) was.
Die sakeman Abbas Al Yousef beweer dat Le Floch-Prigent sy persoonlike raadgewer tydens die bedrogspul was.
Klugman beweer egter dat sy kliënt vasgevang is in ‘n interne politieke magspul.
Al Yousef beweer dat die $48 miljoen gesteel is uit die rekening van die voormalige leier van die Ivoorkus se weermag, Robert Guei. Guei is in 2002 dood, maar Al Yousef het toegang tot sy rekening gehad.
Le Floch-Prigent het al tronkstraf in Frankryk vir korrupsie uitgedien.
– Volg Nuus24 op Twitter
- AFP
