Togo: Polisie spuit traangas op betogers

2012-08-23 11:15

Lome – Togolese veiligheidsmagte het traangas op betogers gespuit nadat hulle in die hoofstad klippe begin gooi en bande aan die brand gesteek het.

Sowat 1 000 mense het in Lome vergader vir die tweede dag van ‘n beplande drie dag lange betoging. Die betogings is deur Let's Save Togo, 'n koalisie van die Togolese burgers en opposisiegroepe, gereël. Volgens die regering is altesaam 10 mense Dinsdag tydens die betoging beseer.

Die regering het verlede week betogings verban, wat reaksie vanaf die koalisie ontlok het.

Sommige opposisiepartye wil hê dat die parlementêre verkiesing wat in Oktober gehou word, uitgestel word sodat hervormings eers kan plaasvind.

Togo word die afgelope vier dekades deur dieselfde familie regeer. Gnassingbe Eyadema het voor sy dood in 2005, die land vir 38 jaar lank regeer.

Kort ná sy dood het die weermag sy seun, Faure Gnassingbe, as president ingehuldig. Hy het intussen die verkiesings in 2005 en 2010 gewen.

– Volg Nuus24 op Twitter 
 

- SAPA