Toeriste gee pad uit Kenia ná ontvoering
2011-10-05 08:08
Manda-eiland (Kenia) – Die Keniaanse polisie het Dinsdag veiligheid verskerp terwyl pogings voortduur om die vrylating van ’n ontvoerde gestremde Franse vrou, wat gereeld medikasie moet neem, te bewerkstellig.
’n Bende van tien gewapende mans het Marie Dedieu (66) op dié eiland in die Lamu-argipel ontvoer en seelangs gevlug.
Die ontvoering is die tweede in die gebied in minder as ’n maand en is ’n verdere slag vir toerisme in Kenia.
Keniaanse beamptes het gesê hulle het bemiddelaars na Somalië gestuur om met die ontvoerders kontak te maak.
’n Man van Manda-eiland, wat die polisie as ’n werknemer van Dedieu identifiseer, word vir ondervraging aangehou.
“Die man wat ons aanhou, het by die vrou se huis gewerk en staan ons by in die ondersoek,” het ’n polisiebron op voorwaarde van anonimiteit gesê.
’n Somaliese inwoner van die dorp Ras Kamboni, waarheen die ontvoerders Dedieu aanvanklik geneem het, het bevestig daar is ongeveer tien ontvoerders.
Dedieu is laat Saterdag of Sondag per motor na die Kismayo-gebied vervoer, het die bron gesê. Sy word egter nie in die dorp – wat onder die Islamistegroep Al-Shabaab se beheer is – aangehou nie, maar buite die dorp.
Adbul Alim, ’n nabye vriend van Dedieu, het gesê sy ly aan kanker en moet elke vier uur medikasie neem.
Die jongste ontvoering het onmiddellik ’n uittog van bekommerde toeriste veroorsaak. Die minister van toerisme, Najib Balala, het egter vir kalmte gepleit.
“’n Emosionele reaksie gaan nie help om die kwessie op te los nie,” het hy Maandag aan verslaggewers gesê. “Die oomblik wat jy jou deure toemaak, veroorsaak jy paniek.”
’n Gewapende bende het ’n Britse toeris, Judith Tebbutt, op 11 September noord van Lamu ontvoer. Haar man is in die voorval doodgemaak.
Seerowers hou haar nou blykbaar in sentraal-Somalië aan.
– Volg Nuus24 op Twitter.
– Sapa-AFP
- Die Burger