Terreurgroepe kan missiele misbruik
2011-10-19 08:17
Pretoria – Honderde en selfs duisende grond-tot-lug-missiele wat weens die burgeroorlog in Libië uit die land se arsenale vermis geraak het, kan deur terreurgroepe gebruik word om veral passasierstralers mee af te skiet.
“Dit is ’n reuse-probleem vir die kommersiële lugvaartbedryf met vliegtuie wat veral in Noord- en Oos-Afrika gebruik word,” het Guy Lamb van die Instituut vir Sekerheidstudie se wapenbeheerprogram Dinsdag gesê.
Amerika het die afgelope week bekend gemaak dat hy ’n span private militêre wapenkenners na Libië gaan stuur in ’n poging om vas te stel hoeveel van die missiele nog in die land is.
Kol. Muammar Gaddafi, voormalige staatshoof van Libië, was een van die wêreld se grootste aanskaffers van dié soort missiele in die 1970’s en ’80’s.
Volgens geraamde statistieke het hy minstens 20 000 daarvan gekoop. Al hou die wapens nie veel bedreiging vir militêre vliegtuie in nie, is dit veral met die opstyging en landing van kommersiële stralers ’n probleem.
Só het Al-Kaïda-terroriste in 2002 probeer om met soortgelyke missiele ’n Israelse passasierstraler af te skiet toe dit in Mombasa, Kenia, opgestyg het.
Volgens Lamb is die groot probleem dat niemand weet presies hoeveel van die missiele en ander wapens in omloop was toe Gaddafi se arsenale deur die rebelle gestroop is nie.
Aanduidings bestaan ook dat van die missiele hul weg oor die Libiese landsgrense heen gevind het. Van die wapens is reeds onderweg na Egipte onderskep.
Die Israelse webblad DEBKAfile berig dat nie net missiele nie, maar ook seemyne en teenlugmissiele onlangs uit Libië gesmokkel is – vermoedelik na die Palestynse bevrydingsgroepe in Gasa, asook na Niger.
Volgens Lamb is daar in die geval van die missiele drie komponente nodig om dit te kan gebruik: die lanseerbuis, die battery en die missiel self.
Binne Westerse sekerheidsregulasies sal die drie komponente afsonderlik geberg word, maar niemand is seker hoe goed of sleg die Libiese weermag se regulasies toegepas is nie.
“Afrika-lande se sekerheidsregulasies vir die berging van wapens en ammunisie is in baie gevalle maar verdag – veral wat betref die bewaking van dié soort missiele.
“Hoewel Amerika en Brittanje die bedreiging waarskynlik die meeste ter harte neem, moet ’n mens aanvaar dat dit ’n bedreiging vir die hele vasteland se lugvaartveiligheid inhou,” het Lamb gesê.
– Volg Nuus24 op Twitter.
- Volksblad