Talle dood ná ontploffings in suide van Somalië
2011-10-31 16:44
Mogadisjoe – Talle burgerlikes is dood tydens ‘n lugaanval op ‘n voedselverspreidingssentrum in die suide van Somalië, twee weke nadat ‘n land- en lugsending deur Kenia in die omgewing begin is.
“Een van die bomme het ontplof naby ‘n kamp waar verdagte lede van die Shebaab kos aan ontwortelde families verskaf het,” het Abdikadim, ‘n plaaslike inwoner, aan AFP gesê.
“Talle mense is daar dood, ek het drie van hulle gesien,” het hy in Jilib, ‘n dorp sowat 100 km noord van Kismayo, Somalië se hoof-hawe in die suide en al-Shabaab se belangrikste vesting, gesê.
“Vier groot ontploffings kon in Jilib gehoor word,” het Moalim Isak, nog ‘n ooggetuie, gesê.
“Ten minste vyf mense is dood toe een van die bomme ‘n voedselverspreidingsentrum getref het.”
‘n Shebaab-beampte het met AFP gepraat op die voorwaarde dat sy naam nie genoem word nie.
Hy het die Keniaanse weermag daarvan beskuldig dat hulle tien burgerlikes vermoor het nadat die voedselverspreidingsentrum geteiken is.
‘n Beampte van die Keniaanse weermag kon nie die voorval bevestig nie, maar hy het erken dat Keniaanse magte tien vegters van al-Shabaab in dieselfde omgewing doodgemaak het.
– Volg Nuus24 op Twitter.
- Sapa - AFP