Talle beseer tydens botsings op Tahrir-plein
2011-11-30 14:22
Kaïro – Sowat 79 mense is oornag tydens skermutselings tussen betogers en straatverkopers in Kaïro se berugte Tahrir-plein beseer, het die departement van gesondheid Woensdag gesê.
Die botsings het begin toe betogers wat reeds byna twee weke op die plein uitkamp, straatverkopers probeer verjaag het. Die botsings het vinnig handuit geruk toe beide kante mekaar met klippe en petrolbomme bestook het, het ooggetuies gesê.
Die geweld het begin slegs ure nadat die eerste fase van die parlementêre verkiesing vreedsaam afgehandel is.
Die meeste van die beserings kon op die toneel behandel word, maar 27 mense moes in die hospitaal opgeneem word, het die departement gesê.
Betogers het die plein beset as deel van ‘n protesaksie teen die militêre raad wat die land regeer sedert Hosni Mubarak se regime in Februarie tot ‘n val gekom het. Die betogers eis dat die weermag mag aan ‘n burgerlike regering oorgee.
– Volg Nuus24 op Twitter.
- Sapa - AFP