Supermodel glo onbewus van sakkie se inhoud
2010-08-05 12:43
Den Haag – Die supermodel Naomi Campbell het Donderdag in die hof getuig dat sy aangeneem het ‘n sakkie 'vuil klippies' was 'n geskenk van Charles Taylor, die voormalige Liberiese president.
Campbell en Taylor het mekaar in 1997 tydens ‘n ete wat deur oudpres. Nelson Mandela gehou is, ontmoet.
“Terwyl ek geslaap het, het ek ‘n klop aan my deur gehoor. Toe ek oopmaak het twee mans ‘n sakkie aan my oorhandig en gesê: ‘Hierdie is ‘n geskenk aan jou,’" het Campbell in die hof getuig.
Sy het glo die sakkie langs haar bed neergesit en dit eers die volgende oggend oopgemaak.
"Ek het ‘n paar klippies gesien. Daar was geen nota aangeheg nie.”
Campbell het aan die regters gesê sy het aanvanklik nie gedink dat die vuilerige spoelklippies diamante is nie.
“Ek is gewoond daaraan om diamante in ‘n boksie te sien.”
Cambell het die volgende oggend tydens ontbyt glo haar voormalige modelagent, Carole White, en die aktrise Mia Farrow, oor haar geskenk ingelig.
“Een van hulle het gesê dit is duidelik ‘n geskenk van Charles Taylor, waarop ek gesê het, ja dit is,” het die supermodel getuig.
Taylor het die diamante glo na Suid-Afrika geneem om dit te verkoop, of in ruil vir wapens te gee.
Die verhoor duur voort.
- Volg Nuus24 op Twitter.
- AFP